Ngā Tamariki o Te Pakanga Tuatahi o te Ao


Te tūhura i te wāhi ki ngā tamariki i te wā o Te Pakanga Tuatahi o te Ao

Ahakoa kāore te pakanga i tae rawa mai ki ngā whenua o Aotearoa, ko ōna pānga i rangona tonutia. I riro mā te ahi kā ngā āhuatanga i hua mai ai i aua pānga e pīkau hei oranga mō ngā tāngata puta noa i Aotearoa, i tāwāhi anō hoki. Tamariki atu, pakeke mai, he haepapa tā tēnā, tā tēnā.

AWNS 19140917 p044 i001 b

I te hunga mātātahi e uru atu ana ki ngā ope taua, ki ngā kapa nēhi, ki ngā mahi rōpū tūao, i te aha kē ngā tamariki o te whakapaparanga o muri mai?

E mārama pai ana tātou o tēnei whakapaparanga i te nui whakahirahira o ngā haepapa me ngā kawenga a ō tātou mātua tīpuna i te wā o te pakanga. Koinā hoki tētahi o ngā take e whakanuia tonutia ana ā rātou mahi i ēnei tau nei. Kia whakaaro tātou ki ō tātou kuia, ki ō tātou koroua o tēnei wā nei, kāore e kore, ko rātou ētahi o te whakapaparanga tamariki o taua wā, ā, he kōrero hoki ā rātou mō te wāhi ki a rātou i ngā tau o Te Pakanga Tuatahi o te Ao.

Ngā haepapa a ngā tamariki i Aotearoa i te wā o Te Pakanga Tuatahi o te Ao

E rārangi mai nei ētahi whakaahua o ētahi tamariki i ora i te wā o Te Pakanga Tuatahi o te Ao. Kua whakairihia ēnei hei whakaatu i ētahi o ā rātou haepapa i taua wā.

I a koutou ko ngā ākonga e tirotiro haere ana ki ēnei whakaahua, whakaarohia ngā pātai nei:

He aha te take i karangahia ngā tamariki o te wā ki ēnei mahi tūao?

He aha ngā tohu o te tuakiri o te tangata nō Aotearoa e kitea ana i ēnei whakaahua?

He aha ētahi āhuatanga o ēnei rā e rite ana, e rerekē ana hoki ki ngā āhuatanga i te wā i a rātou?

He aha ngā tūmomo mahi kua kawea e koutou hei hāpai i tētahi mahi nui whakaharahara?

Te kohikohi pounamu koata

I te ekenga ki te tau 1916, ka kitea te mimiti haere o ngā pātara koata. He mea minaka ngā pātara koata kau e ngā kaikōpiro waipiro, e ngā kēmeti, e te tūmatanui anō hoki mō ngā mahi huhua. Nā te kāwanatanga o te wā i kōkiri te mahi kohikohi pātara koata hei mahi penapena pūtea, ā, ko te hunga tamariki tērā i kaha kohikohi haere. Ka  huri hei whakataetae i waenganui i ngā kura. He mea pūrongo te kaha o te whakataetae e ngā niupepa. E ai ki tētahi tuhinga i puta, i eke te kohinga o tētahi kura ki te 10,000 pātara. I hokona atu ngā pātara hei ara kohikohi pūtea mō ngā tahua pūtea mō te pakanga.

Toronga: Sir George Grey Special Collections AWNS-19160824-44-7

Toronga: Sir George Grey Special Collections AWNS-19160824-44-7

Te whatu, te tuitui, te tā i te kupu

He whakakitenga tēnei o ngā manomano tamariki o ngā kura huhua o Tāmakimakaurau me ngā kākahu i oti i a rātou te whatu me te tuitui mō te Tahua Pūtea mā Piritana, mā Pehiamu ka tahi, mā ngā hōia nō Aotearoa i tāwāhi i te marama o Hōngongoi i te tau 1915. I whakatairangatia tēnei momo mahi i waenganui i te hunga tamariki hei hāpai i ngā āhuatanga whakararata i ngā hōia i tāwāhi e noho tawhiti ana i ō rātou whānau me ō rātou hapori anō hoki. He tōkena, he kāmeta i whatuhia, i tuituia; he reta i tuhia; he pūhera hoki i tukuna ki ngā hōia ‘mokemoke’, ki ngā ākonga o mua o ō rātou kura, ki ngā tāngata hoki nō ō rātou hapori tonu. Kāore e kore i kaingākautia ēnei whakaaro i tae atu ki a rātou hei whakamaumahara i a rātou he tāngata kei te kāinga e whakaaro nui ana ki a rātou.
Me tono whakaae i Ngā Whare Mātauranga o Tāmakimakaurau i mua i te whakamahinga

Me tono whakaae i Ngā Whare Mātauranga o Tāmakimakaurau i mua i te whakamahinga o tēnei whakaahua.

Te hoko rawa

I te marama o Mahuru, i te tau 1914 i tāngia ki te hautaka Te Hautaka ā-Kura tētahi reta nā te Hekeretari Mātauranga, nā George Hogben i tuhi ki ngā pouako matua o ngā kura tūmatanui puta noa. I roto i tana tuhinga ka inoi ia ki ngā tamariki puta noa i Aotearoa kia whakatakotoria e rātou tētahi whakaaro hei hāpai i ngā mahi tautāwhi hōia. Ka āta kīia atu, mā ngā kura ngā tamariki e akiaki ki te whakatakoto ‘whakaaro rangatira’ hei tautoko i ngā tāngata e noho tūroro ana i te pakanga. Ka riro mā ngā kura te kawenga nui ki te āta whakahaere me te whakarite i ngā whakaaro a ngā tamariki. Ka tono tautoko i ngā kirirarau katoa ahakoa ko wai, ā, kāore i ārikarika te hīkaka o ngā tamariki ki te whakautu i taua tono. Ko Ruth Swanson tēnei tamāhine nō Kawakawa e tū tahi ana ki tana reme mōkai, tērā i whakatakotoria hei koha ki te Patriotic Fund. I te mutunga iho, ka hokona atu te reme, he £36 5 herengi 6 taima (i te takiwā o te $5400 te rite o taua utu i te tau 2012) kātahi ka whakahokia ki te whānau Swanson.
Toronga: Sir George Grey Special Collections AWNS-19140917-44-1 Me tono whakaae

Toronga: Sir George Grey Special Collections AWNS-19140917-44-1 Me tono whakaae i Ngā Whare Mātauranga o Tāmakimakaurau i mua i te whakamahinga o tēnei whakaahua.

Kuputaka

haepapa

kaikōpiro waipiro  

pūhera

responsibility

brewer

package; parcel

 

  • TT
  • Tāngia.
  • Tiritiria.

Kaiako' Notes

Ka tūhuratia i konei te wāhi ki ngā tamariki i te wā o Te Pakanga Tuatahi o te Ao. Ka tirohia:

  • ngā mahi a ngā tamariki ki te tautoko i ngā āhuatanga ka hua mai ai i te pakanga.
Tīkina ake.