Ngā pānga o te wā i noho kāwanatanga ai a Hāmoa Tiamana e Aotearoa, ā moroki noa nei


Ko te kuhunga tohe taikore “Mau” tērā i kōkirihia i Hāmoa i ngā tau o mua. Ka horapa tana rongonui ki te tohe mutunga kore kia kaua a Hāmoa e noho ki raro i te mana whakahaere o Aotearoa anake. I taua wā, ko Aotearoa tērā i whakapūwhenua i te whenua ki Hāmoa. He mea tūpono noa iho tēnei āhuatanga. Me i toa a Tiamana i Te Pakanga Tuatahi o te Ao, kua kore te kāwanatanga o Te Tōpūtanga o ngā Whenua o Ingarangi e eke ki te taumata whakahaere, ā, kua kore e taea e Aotearoa te tango mōna anō te mana whenua o Hāmoa. Ko te tikanga matua nā reira i noho mana whakahaere a Aotearoa ki Hāmoa, ko te hiahia o Te Tōpūtanga o ngā Whenua o Ingarangi kia whānui ake tōna mana i Te Moana-nui-a-Kiwa.

robert logan

Waihoki, ko te tari matua o Mau i noho ki te takiwā o Vaimoso. He nui whakahirahira tēnei tūāhuatanga, i te mea, i te taone matua o Āpia te takiwā nei, ā, he wāhi pai hei whakahuihui i te tangata i tōna noho ki te pokapū. Ka kōkiritia te Mau e tētahi tokotoru aumangea - ko tētahi o rātou nō Hāmoa tonu, he tipua; ko tērā atu tokorua he whakapapa ō rāua ki Aotearoa. Ko Tupua Tamasese Lealofi te tuatoru rātou ko A.G. Smythe, ko Taisi Olaf Nelson ngā ingoa. Ko ēnei amorangi ērā i pupuri tonu ki ngā tikanga o te Mau hei tohu i te rangatiratanga o Hāmoa. Ka noho hei tohu i tētahi iwi e mōrearea ana tōna tuakiri i te tangohanga o tō rātou noho rangatira e ngā kaitango.

Kaiwhakahaere o Hāmoa, Kānara Robert Logan, e whakapāho ana i te Pānuitanga Kāwanatanga i te whakatarenga o te kara ki Āpia i te 30 o Hereturikōkā i te tau 1914. Koinei te mahi i te ata i muri mai i te rironga o te mana whakahaere Hāmoa Tiamana ki te NZEF. Toronga: 1/4-017522-F Kaiwhakaahua: Malcolm Ross. Me tono whakaae i Alexander Turnbull Library, Te Puna Mātauranga o Aotearoa, i mua i te whakamahinga anō o tēnei whakaahua.

Ko te whakamāoritanga o te kupu ‘Mau’ ko te taunaki. Ko tōna āhua he kaituhi noho rangatira. Ko te Mau hoki tērā i whakakōrero i ngā whakaaro o ngā tāngata Hāmoa i noho tāmi i raro i Aotearoa. I te tau 1918, i whakaaetia te taunga atu o te kaipuke “Talune” ki Āpia. I runga i te kaipuke nei ētahi pāhihi i pāngia ki te mate rewharewha Pāniora. Kua mōhiotia whānuitia kāore ō te iwi Hāmoa ngā āhuatanga e tika ana ki te ārai i ngā mate pēnei te rite i tō rātou manauhea, i ngā tikanga hauora hoki. Ka kahakina e tēnei mate rewharewha te manomano tāngata. Ka mōhio rawa ngā tāngata o Aotearoa ki te pānga o tēnei mate me ōna āhuatanga. Ka tae atu te hiahia o Hāmoa o Amerika ki te tautoko mā te tuku rawa ā-rata, heoi anō, kāore i whakaaetia e te ture o Aotearoa. I konei ka kite i te kokenga o te kuhunga Mau i te haukerekeretanga o ngā tāngata o Hāmoa i te tipu o ngā whakaaro mana rangatira.

 

Ka kōrero a Tauanu’u Perenise Tapu mō te wā i nōhia ai te whenua o Hāmoa o Tiamana e ngā ope taua o Aotearoa me tōna pānga ki te pāpori o Hāmoa i taua wā me nāianei tonu nei. Ka whai whakaaro hoki ia ki te wā o muri i te pakanga, i a Hāmoa e whai mana motuhake ana, tērā i kōkirihia e te kapa Mau.

I uekaha te kuhunga Mau i ngā tau o muri mai i waenganui i te tau 1920 me te tau 1926. Ka tohe tonu kia mutu ngā mahi tūkino i pā ki ngā tāngata o Hāmoa. Ko te wheta a Aotearoa i te nuinga o ngā whenua o Hāmoa tētahi tauira o ngā tūkinotanga. Ko te rahinga o ngā rawa māori noa i riro i ngā ringa o ngā tāngata o Hāmoa. I noho whenuakore ngā tāngata Hāmoa i tō rātou whenua ake. Ka hāmenetia te hunga i tohe tonu ki ngā whakahaere o Aotearoa. Kāore te tamaiti kāore tōna ingoa whānau Pākehā i whakaaetia i te kura. Ko te hunga kāore i utu tāke ki ngā ture o Aotearoa i panaia i ō rātou takiwā, i tukuna rānei rātou kia noho taurewa. Ka pēneitia ngā kaiurungi o te Mau. Ka taurewatia rātou ki Aotearoa i runga i te pōhēhē ka ngoikore haere te kaha o te kuhunga Mau. Ka noho kē tēnei hei take tutungi i te hiahia o ngā kaikawe tohe o Mau kia ea tā rātou i wawata ai. He tokomaha tāngata anō i piri atu ki te kapa Mau, i tū kaha hoki ngā mema o te wā ki ngā tāmitanga o Aotearoa.

He huinga tangata e karapoti ana i te tari Mau

He huinga tangata e karapoti ana i te tari Mau, ko Tupua Tamasese Lealofi III kei waenganui e noho ana, e mau kara mā ana. Ko ngā kupu whakatairanga Samoa Mo Samoa e tīkei ana i te tatau, 1928. He mea tango i te pae tukutuku Alexander Turnbull Library Toronga: PAColl-0691-2 Kaitango whakaahua: Alfred James Tattersall. Me tono whakaae i Alexander Turnbull Library, Te Puna Mātauranga o Aotearoa, i mua i te whakamahinga anō o tēnei whakaahua.

I te 29 o Hakihea i te tau 1929, ka hīkoi te kapa Mau ki te ara o Beach i a rātou e whakarite ana ki te whakahoki mai i ngā mema i noho taurewa ki wāhi kē. He rangi tēnei i nui kōingotia e te kapa Mau. He rangi e tika ana kia whakanuia, engari ko te parekura tōna mutunga. Tekau mā tahi ngā mema i puhia e ngā āpiha o Aotearoa, ko Tupua Tamasese hoki tēnā. E ai ki ngā āpiha, i puhi haere ai rātou, i runga i te pōhēhē i reira kē te kapa Mau ki te tohe ki tō rātou whai mana. Kāore i kore i wehi ngā āpiha i taua wā. Ka noho tēnei rā hei tohu whakamaharatanga, ko tōna ingoa ko “Te Hātarei Pango”. He take anō tēnā kāore i āta māramatia ka tahi, i horihori ka rua. Pēnei i te pānga o te mate rewharewha Pāniora, he aituā ēnei i taea te karo.

Ahakoa ngā aituā nui taioreore, ka renarena ake te taura here o ngā tāngata Hāmoa. Ka tīmata ngā mema o Mau ki te mau kara - he tīhāte mā, he lavalava waiporoporo. Ka kīnakitia te mau kara ki ngā waiata, ki ngā kōrero paki e pā ana ki ngā whakapātaritari o te wā. Ka whai take ngā tāngata o Mau i ngā tūkinotanga o Aotearoa ki ō ngā tāngata o Hāmoa, ki te tohe i tō rātou tino rangatiratanga me tō rātou mana rangatiratanga, kaua kē ia ko te ngaki i te ngā parekura.

E kitea ana i ēnei rangi nei te hiahia o ngā rangatahi Hāmoa ki te whakanui i te ara ki te tino rangatiratanga i takahia e ngā tāngata o Mau hei tāngata Hāmoa ka tahi, hei tāngata o Te Moana-nui-a-Kiwa ka rua. E wātea ana tātou ki te ako i ngā mahi o nehe, ki te ora i tō tātou nāianei, ki te mārama ki tō tātou ao haere ake nei hoki. Kua nui tā tātou koke whakamua i ngā tau.

I pā te āmaimai ki Hāmoa i ngā rangi tōmua o te whai mana whakahaere o Aotearoa ki Hāmoa. I te tau 1918, i whakaaetia te paenga ki uta o te kaipuke hokohoko Talune e ngā āpiha o Aotearoa kua mate rewharewha Pāniora ētahi o runga i te kaipuke. I reira, horapa kino ai te mate rewharewha Pāniora i Hāmoa. Kātahi, i te Hakihea o te tau 1929 ka pūhia kia mate tētahi tokoiwa Hāmoa i ngā tāngata rā e whakaari ana i raro i te marumaru o te tohe taikore, Mau.

Ko Tupua Tamasese Lealofi te tuatoru.

Ko tētahi o te hunga rā i mate, ko tētahi o te kāhui āriki o Hāmoa, ko Tupua Tamasese Lealofi te tuatoru, kaiārahi matua o te Mau, ko ia te tangata e takoto ana i tēnei whakaahua. He mea tango i te pae tukutuku Alexander Turnbull Library Toronga: PA1-o-795-16. Me tono whakaae i Alexander Turnbull Library, Te Puna Mātauranga o Aotearoa, i mua i te whakamahinga anō o tēnei whakaahua.

Kua aua atu ngā tau, kua whanake ngā whakaaro. E anga whakamua ana ki tētahi ao me he uakōau me tētahi tirohanga rerekē. Kua āhua 50 ngā tau a Hāmoa e noho ana i raro i tōna ake tino rangatiratanga ā-tōrangapū. Kei te ora tonu ngā whakaaro ki te pono, te tōngakingaki, me te puku mahi i kawea e te Mau. Kua tutuki i ētahi o te iwi Hāmoa ētahi mahi kāore i whai wāhi i mua. Hei tauira ake, kua noho matua te ako. He tangata Hāmoa kei ngā tūranga mahi rerekē e whakapeto ngoi ana. He kaimahi ahumahi, he kaitākaro hākinakina, he kaitōrangapū anō hoki ētahi noa iho. He hua ēnei o ngā kōkiritanga o te Mau.

I te tau 2002, ka tuku whakapāha te Pirimia o Aotearoa, a Helen Clark ki ngā tāngata o Hāmoa mō ngā aupēhitanga. Nāna i kī ake i ngoikore, i hē hoki ngā whakahaere a ngā kaiwhakahaere tōmua o Hāmoa nō Aotearoa.

‘Ka whakatakoto i konei te whakapāha ki ngā tāngata o Hāmoa i noho marurenga i raro i ngā mahi aupēhi a ngā kaiwhakahaere nō Aotearoa i ōna tau tōmua. E tuku aroha ana, e ngetengete ana hoki i te āhua o aua aupēhitanga.’

Kuputaka

haukerekere -tanga    

overwhelmed

horihori

misjudged

kuhunga

movement

marurenga

victim

noho taurewa

as a refugee

ngetengete

apologise

tohe taikore

peaceful protest

uakōau

stranger

whakakapi -nga

occupy; occupation

wheta

struggle

  • Ao
  • Tāngia.
  • Tiritiria.

Kaiako' Notes

He kupu whakamahuki

E tūhuratia ana i tēnei rauemi ngā pānga o te wā i noho kāwanatanga ai a Hāmoa Tiamana e Aotearoa i te wā o Te Pakanga Tuatahi o te Ao, i muri mai hoki i te taunga o te puehu.

  • He aha rawa te whakakapinga o Hāmoa Tiamana?

  • He aha te kuhunga Mau?

  • He aha a Aotearoa i ngetengete atu ai ki a Hāmoa?
Tīkina ake.