Ngā hōia o Te Moana-nui-a-Kiwa


Te tūhura i te wāhi ki ngā tāngata nō Te Moana-nui-a-Kiwa ki te New Zealand Expeditionary Force (NZEF) i te Pakanga Tuatahi o te Ao.

rarotongan company

Ko ngā kōrero onamata, ko ngā takiwā i nōhia, ko te whakapapa hoki tērā e whiri ana i te nape here tangata o te iwi Māori, o ngā iwi hoki puta noa i ngā moutere o Te Moana-nui-a-Kiwa.

Ko te Pakanga Tuatahi o te Ao tētahi o ngā aho matua o tēnei herenga tangata, tērā ia te aho nā reira i ngātahi ai te tautoko a te iwi Māori me ngā iwi o Te Moana-nui-a-Kiwa i te Kāhui Whenua o Piritana.

Taetae atu ngā tūao nō ngā moutere huhua o Te Moana-nui-a-Kiwa ki te uru atu ki te kapa New Zealand Expeditionary Force (NZEF) ka mutu, ko te rahinga nō te Kuki Airani, nō Niue anō hoki, ngā whenua i rohea e Aotearoa i te tau 1901.

Ko ngā ope tānga tuarua, tuatoru anō hoki nō Kuki Airani, i mōhiotia ko te Kamupene Rarotonga, i whai wāhi ki te pakanga me ngā tāngata o Piritana ki Hinai (Sinai), ki Parahitini hoki hei hoariri ki te kāhui Ottoman Turks.

I uru atu ngā tāngata o te Kuki Airani, o Niue hoki i ō rātou whenua ake kātahi rātou i tukuna ā-kapa mai ki Aotearoa. Ka mate ngā tāngata nō moutere kē o Te Moana-nui-a-Kiwa ki te rapu ara ake ki Aotearoa rēhita ai.

Ka kōrero a Tinokura Tairea te wāhi ki ngā tāngata Kuki Airani i Te Pakanga Tuatahi o te Ao, tō rātou hononga ki Te Ope Māori me te whakarewatanga o Te Ope Rarotonga. Ka whakahoki mahara hoki ia ki ngā pānga o Te Pakanga Tuatahi o te Ao ki ngā moutere Kuki Airani me ngā tāngata Kuki Airani i Aotearoa.

Ka whirinaki atu rātou i tae mai ki Aotearoa i te wā i te whakangungu ngā tāngata Niue, ngā tāngata Kuki Airani rānei ki aua ope. Ko rātou i tae mai i waho atu i aua wā i whakahokia wawetia ki ō rātou kāinga ake.

He tini tūao nō Tonga i piri atu ahakoa kāore ō te Kīngitanga o Tonga hononga ā-mana ture ki te Mananui Piritana. He hua tēnei o te Tiriti Haumi i waenganui i a Tonga me Piritana. Ka kūrakuraku tēnei tū mō Tonga i te herea ō rātou ki te ā i te iwi Hāmoa-Tiamana i tōna rohe i te tau 1916.

He mea rohea ngā moutere o Whītī, o Gilbert, o Ellice hoki e Piritana. I te tau 1918 i te wā i puta ai te huatau o Whītī ki te tuku ope he tangata taketake o roto ka kawea hei take atu i Piritana ki Aotearoa. I rite tonu te huatau i mahuta ake i ngā moutere Gilbert me Ellice hoki. Ka whakaaetia ngā tono e rua. I Tāmakimakarau ēnei ope e whakangungu ana i te otinga o te pakanga i te marama o Whiringa-ā-rangi i te tau 1918.

He huhua ngā take piere nuku i tau ki te aroaro o ngā hōia nō Te Moana-nui-a-Kiwa i te wā o te pakanga. Kāore i a te nuinga te reo Pākehā, i uaua hoki mō rātou te kai i ngā momo kai rerekē me te mau pūtu hoki. Ko tētahi o ngā tino mōreareatanga ki ngā mate tauhou i pā atu i roto hoki i te hanga mātao o te huarere i Wīwī ki te raki.

Te Kamupene Rarotonga ki Sinai, ki Palestine hoki i te tau 1916-1918

Te Ope Tuatahi o te Kuki Airani i Te Pakanga Tuatahi o te Ao i Narrow Neck Camp,

Te Ope Tuatahi o te Kuki Airani i Te Pakanga Tuatahi o te Ao i Narrow Neck Camp, Tāmakimakaurau.

I tukuna e ngā iwi o te Kuki Airani te 45 tāngata ki te pakanga i te marama o Whiringa-ā-nuku i te tau 1915. 120 ngā tāngata i uru atu i te ope tānga tuarua, ka wehe i Rarotonga ki Tāmakimakaurau i te marama o Hōngongoi i te tau 1916. Ka tika tonu atu rātou ki te hopuni whakangungu hōia o Narrow Neck.

Tae atu ki te Mahuru i te tau 1916 i maunuhia ngā tāngata Niue i Wīwī, i raru pai hoki ngā tāngata Rarotonga i te anu mātao o te takiwā. I puta te whakahau i a Tianara Godley me noho tonu te ope tānga tuarua o te Kuki Airani ki Aotearoa tae noa atu ki te paunga o te hōtoke. Ka tukuna kētia ēnei tāngata e te iwi Piritana hei ope waonga ki te kōawa Suez hei tuatahi. Kia mahana haere ngā rā ka tukuna rātou hei tānga mō te Ope Tuatahi o Aotearoa i a rātou e pakanga ana ki te rohe ki te Uru. I whakaaetia tēnei tono, ka tere waka atu ngā tāngata Kuki Airani ki Suez i te marama o Whiringa-ā-rangi i te tau 1916 hei ‘Ope Tānga Māori Tuangahuru mā Tahi’.

He mea taunaki ngā tāngata Kuki Airani i te NZEF ki Ihipa ka tahuri ki te tautoko i te kawenga a Piritana i te pakanga ki te ope Ottoman Turks ki Hinai, ki Parahitini hoki. Ka mōhiotia whānuitia te ope nei ko te Kamupene Rarotonga, ka pēnei tonu tōna tū, ā, mutu noa te pakanga. I te Huitanguru o te tau 1918 i tukuna ngā hōia Kuki Airani me ērā o ngā mōrehu o Te Moana-nui-a-Kiwa o te Ope Māori Tuatahi i Wīwī ki te Kamupene Rarotonga ki Palestine. I te marama o Hereturikōkā i te tau 1918, tae atu ai te ope tānga tuatoru o te Kuki Airangi i Aotearoa. I taua wā eke ai te nama o te ope nei ki te 280.

Ko ā te Kamupene Rarotonga kawenga he tango atu i ngā whakaputunga i ngā waka haere moana o te ākau Mediterranean ka tahi, he hari hāmanu pū mō te Royal Artillery Eastern Force Ammunition Unit, ka rua.  Kāore i kō atu, kāore hoki i rongonui atu i a rātou i te kaha, i te tere, i te kounga ake hoki o ā rātou mahi i ā ētahi atu. Ka tipu te wairua hē i tēnei tūāhuatanga i waenga i ēnei hōia me ngā tāngata Ihipa i te mea ko rātou hoki e kawe ana i ēnei kawenga nā reira i tohungia ai ngā hōia o Te Moana-nui-a-Kiwa ki tētahi mahi mana nui ake, te hari ā-ringa i ngā hāmanu pū. Ko tā rātou he hari i ngā hāmanu pū ki te aroaro pakanga. I meatia kia kaua rātou e kitea, kia kaua hoki ngā haupūtanga hāmanu e kitea e te hoariri. I te paunga haere o te pakanga i whai wāhi hoki rātou ki ngā mahi tārake i ngā whakaputunga hāmanu i kohia i ngā hoariri.

Ahakoa te pai ake o te huarere i te rohe Middle East mō ngā tāngata nō Te Moana-nui-a-Kiwa, i whera tonu rātou ki ngā māuiui o taua takiwā, koia ia te mate urutā Malaria. Heoi anō, kāore tonu i pērā rawa te nui o te hunga i mate pērā i Wīwī, ā, ka riro mā tēnei tūāhuatanga te whakatau, ka whakawhiti atu i ngā hōia i te Ope Tuatahi ki te Kamupene Rarotonga.

I te marama o Hakihea i te tau 1918 ka hoki atu te Kamupene Rarotonga ki Aotearoa. I te putanga o te mate urutā rewharewha ka purutia ngā tāngata i pāngia ki taua mate rā ki te moutere o Matiu (Somes Island) i Te Whanga-nui-a-Tara. I whakahokia te rahinga o rātou ki Rarotonga i te marama o Poutū-te-rangi o te tau 1919 i te wā i kitea kāore tēnei mate e toro haere tonu ana.

Ngā tūao hōia nō Niue i te hopuni whakangungu Narrow Neck, Sir George Grey Speci

Ngā tūao hōia nō Niue i te hopuni whakangungu Narrow Neck, Sir George Grey Special Collections. 7-A14556

Te Ope Whītī, te Ope Gilbert Island 1918

I tukuna e Whītī, Whenua nō te Karauna Piritana, ōna ope, me ōna ope tānga hei hōia ki te ope taua Piritana pū. I te tīmatanga i whakaaetia ngā tāngata Pākehā anake i ēnei ope heoi anō, i te tau 1917, i whakaaetia te Fiji Labour Corps hei kaihiki whakaputunga i ngā pūaha o Wīwī, o Itāria hoki. I te wā o te tuku i te tāpaetanga o tētahi ope tānga takinga maha i te tau 1918 ki te Hekeritari o te Takiwā mō ngā Whenua ki ngā mana o Aotearoa, ka whakaaetia. I tatū atu ngā tāngata Whītī ki Tāmakimakaurau i te Hereturikōkā o te tau 1918, ka tika tonu atu ki te hopuni whakangungu hōia o Narrow Neck me te ope tānga tuawhā nō te Kuki Airani.

I whakatakoto tono hoki tētahi atu whenua o Piritana, ngā moutere Gilbert me Ellice, i runga i te haerenga atu o tētahi 25 tāngata o te kapa Pirihimana Taketake Gilbert ki te rēhita ki te whawhai. Ka tukuna tēnei tono e ngā tāngata o Rānana ki ngā tāngata o Te Whanganui-a-Tara. I whakaaetia, ā, ka pae atu ēnei tāngata ki Tāmakimakaurau i te marama o Hōngongoi i te tau 1918.

Nā ngā tāngata o ēnei whenua tonu ngā nama a ō rātou tāngata i te kapa NZEF i utu. Otirā, kāore a Tā James Allen, te Minita Waonga o Aotearoa, i whakaae ki te āhua ki te iti ake o te utu ki ngā hōia o Gilbert i tērā o te utu i whakawhiwhia ki ngā hōia haumi Ūropi. Nā reira ka puta i a ia te whakatau, māna, mā tana tari tētahi pūtea e tāpiri atu kia ōrite. E ai ki a Ellen, ahakoa Māori mai, Pākehā atu; tangata nō Te Moana-nui-a-Kiwa mai, nō Piritana atu, me rite tonu te utu.

I tukua te kapa whenumi o ngā hōia o Te Moana-nui-a-Kiwa ki Te Whanganui-a-Tara i te marama o Whiringa-ā-nuku i te tau 1918 kia tukuna tahitia atu ki tāwāhi. I te pānga tuatahi o te mate urutā rewharewha i tauāraitia ēnei hōia, i whakahokia atu ki Tāmakimakaurau. I mate tētahi tokomaha, ā, ko ngā mahuetanga i whakahokia ki ō rātou whenua ake i muri mai i te Armistice. Mō te āhua ki ngā tāngata nō ngā moutere Gilbert, i roa mā rātou te tukanga i whāia. I te āhua o ngā here tauārai me te angiangi hoki o te kāhui kaipuke, i tata pau te tau kotahi i mua i tō rātou hokinga atu ki tō rātou whenua.

Ngā taero a Kupe

Inā te rahi o ngā taero a Kupe i tatū atu ki te aroaro o ngā hōia o Te Moana-nui-a-Kiwa i tō rātou wehenga atu i ō rātou ūkaipō ki te urunga atu ki tētahi ope taua.

Kāore te nuinga o rātou i kōrero i te reo Pākehā. Koia tētahi o ngā mahi tōmua i te taenga atu o ngā tāngata ki Narrow Neck, ko te tautohu ko ēhea o te tokomaha he paku reo Pākehā ō rātou - koinei te hunga i whakanōhia ki ngā tūranga NCO. I whakaakona ērā atu ki ngā tohutohu ope taua māmā heoi anō, ka mate tonu rātou ki te whirinaki atu ki ngā hōia reo Pākehā hei hoa whakamāori i ngā kōrero e mārama ai rātou he aha te aha.

Ko te mau pūtu tētahi āhuatanga nā reira i raru ai ngā tāngata kua waia haere ki te kore mau hū i te mata o te whenua me te moana. Ka hoahoatia ētahi pūtu mō te hunga nō Niue ehara ō rātou waewae i ngā ‘waewae māori noa’.

Ko ngā momo kai hoki tētahi atu āhuatanga rerekē nā reira i māniania ai ēnei hōia. I whāngaia ngā tāngata Niue me ngā tāngata Kuki Airani ki te maha o te ika me te huarākau, i iti ake te whāngai i a rātou ki te mīti i tērā te nui i hoatu ki ngā tāngata o Aotearoa.

Heoi anō, ko te matua o ngā taero a Kupe nā reira i raru ai, i riro hoki ai ngā hōia nō Te Moana-nui-a-Kiwa i ngā mate o te iwi Pakehā me te ngoikore o ō rātou tinana ki te tohe ki ēnei momo mate. Ko ngā tāngata nō Niue te hunga i tino rongo i te uaua o tēnei tūāhuatanga i te hanga tūhāhā o tō rātou moutere. Ko te māuiui, ko te mate i tīmata i Narrow Neck, ka haere hei hoa mō rātou nō rātou e pakanga ana ki tō rātou hokinga atu ki te kāinga.

Ka pae atu ngā hōia nei ki Suez ka haere tūroro atu ki te hōhipera. Ka kaha ake te mehameha i tēnei tūāhuatanga i te korenga o te reo e tika ana i taua whenua. I Ihipa, i Wīwī, i Ingarangi anō hoki tūroro ai te tokomaha o ngā hōia Niue me ngā hōia Kuki Airani i ngā take ka puta i ngā tū māuiui pēnei i te mate karawaka, te mate kōea, me te rewharewha. I te nuinga hoki o te wā, kāore he tangata nō Te Moana-nui-a-Kiwa anō i te hōhipera hei hoa kōrerorero.

He wāhi nui āhuarangi o aua whenua ki te pānga o te māuiui, ka mutu, koinei hoki tētahi o ngā taunakitanga nā reira i maunuhia ai ngā hōia Niue i Wīwī ki te raki, me te tuku hoki o te ope tānga tuarua nō te Kuki Airani ki Parahitini. Ko rātou i tāwāhi tonu i te taunga o te puehu ka rongo i te uaua o te ora i tētahi atu mate urutā, tērā i kīia ai ko te mate urutā rewharewha Pāniora.

I te waitohutanga o te Armistice i te marama o Whiringa-ā-rangi i te tau 1918, i ngā takiwā maha ngā hōia o Aotearoa nō Te Moana-nui-a-Kiwa. Ko te matua o ēnei ope ko te Kamupene Rarotonga i Palestine e 300 ōna tāngata. He tangata takitahi i ngā hōhipera ki Wīwī, ki Ingarangi, ki Ceylon (Sri Lanka) hoki. He ope tonu i te hopuni whakangungu o Narrow Neck. Kātahi anō ka tau atu te Ope Tānga Tuarima Kuki Airani i tatū atu ki Tāmakimakaurau nō tōna wehenga atu i Rarotonga i te 29 o Whiringa-ā-nuku.

He rite tonu te whakanuia o ngā hōia i taunaki i te Pakanga Tuatahi o te Ao nō Te Moana-nui-a-Kiwa e ō rātou uri ake i runga i te mana nui, ā, i runga i te hiahia kia mārama ake rātou ki ngā hītori nā reira i pēnei ai te hanga o ngā tāngata me ōna āhuatanga katoa i Te Moana-nui-a-Kiwa. 

He hokinga mahara

He tohu whakamaharatanga ki ngā tāngata nō te moutere o Atiu i te whenua Kuki Ai

He tohu whakamaharatanga ki ngā tāngata nō te moutere o Atiu i te whenua Kuki Airani i tū hei hōia me NZEF i te Pakanga Tuatahi o te Ao. Nā Pitt Media Group, Kuki Airani.

Takitini ana te tangata nō Te Moana-nui-a-Kiwa i whai wāhi nui ki te Pakanga Tuatahi o te Ao, ā, i konei ka tirohia ētahi o aua tāngata:

Pa George Karika, nō Te Kuki Airani
Sergeant Pa George Karika(external link) DCM

He tānga o ngā hōia tokotoru: ko Pa George Karika rātou ko Iaveta Karika, ko Pia

He tānga o ngā hōia tokotoru: ko Pa George Karika rātou ko Iaveta Karika, ko Piat M. Mani. http://www.aucklandmuseum.com/war-memorial/online-cenotaph/record/C34185

I whakauru atu a Pa George Karika ki te ope tuarua nō ngā motu Kuki Airani. Nā tōna mātanga ki te reo Pākehā me tōna mana nui i waenganui i ōna tāngata i riro wawe i a ia te taitara kāpara i te wehenga atu o te kapa, i kīia ai ko te Ope Rarotonga, i Aotearoa i te marama o Whiringa-ā-rangi i te tau 1916.

Ka whakahaungia a Karika ki te tūranga haihana nō rātou mō tana ope i Ihipa. I te tīmatanga i tū i te tū a te hōia i te kapa Eastern Force Ammunition Column, ka whakawhiti atu ai i te marama o Whiringa-ā-nuku i te tau 1917 ki te Ope Tuangahuru mā Whitu Heavy Battery, Royal Regiment of Artillery. I te marama o Huitanguru o te tau 1918 i whakawhiwhia ki te tangata nei te tohu Whakamana Kawenga mō tana ‘whakapeto ngoi me tana tōngakingaki ki ngā kawenga hōia nōna i whakahaere ai i tētahi kapa hōia’.

I noho tūroro a Karika i tētahi hohipere i te paunga o te tau 1918 ka hoki ki Aotearoa, ka whakawāteatia ai. I whakawhiwhia ki a ia tana tohu DCM i Rarotonga i te marama o Poutūterangi i te tau 1921. I whānau mai a ia he uri kāhui ariki, i tapaina ki a ia tōna ingoa ariki Makea Karika nō muri mai i te rirohanga o tōna whaea.

Sergeant-Major Uea nō Niue

'Sergeant-Major Uea', URL: http://www.nzhistory.net.nz/media/photo/sergeant-majo

He mea koha tēnei whakaahua ‘Sergeant-Major Uea’ e Marion McQuoid: http://www.nzhistory.net.nz/media/photo/sergeant-major-uea (Manatū Taonga). I whakahoungia ēnei pārongo i te 2 o Mahuru 2014.

He minita, he kaiako taketake hoki a Uea, te mataamua ā-tau o te ope taua i whakatere waka mai ki Aotearoa i te marama o Whiringa-ā-nuku i te tau 1912. He rangatira a ia i tōna whenua i roto i āna mahi whakatairanga i ngā āhuatanga taunaki i te pakanga, i te tautoko ā-pūtea, me tana tū hei tūao ki te ope taua o Niue. Nā ēnei tūāhuatanga a Uea i tohua ai hei kaikawe karakia mō te kapa, i whakahaungia hoki hei haihana ka mutu, hei haihana-meiha.

Me he pāpā te tangata nei i waenganui i ngā Niue, ā, nā tana mōhio ki te kōrero me te tuhituhi ki te reo Pākehā i tino mārama ki tana hira nui hei herenga tangata. He rite tonu tana whakarite wā e karakia ai ngā tāngata, nāna hoki te taha ki te atua o ngā uhunga i kawe mō ōna huānga ake nō Niue ki Tāmakimakarau, ki Ihipa, ki Wīwī, ki Ingarangi, ki tai anō hoki.

Nō muri mai i tana hokinga atu ki Niue i rangatira katoa ōna whakaaro ki a ia anō me tana hāpai i te pakanga hei hōia ka mutu, i kitea a ia e mau ana i ana kara i ētahi wā i te ara matua o te taone o Alofi. I tana matenga i te tau 1947, i nehua a ia ki ōna kākahu hōia katoa.

Ratu Vuiyasawa (Fiji)
Private Ratu Tiale Bau Mara Vuiyasawa

'Ratu Tiale Vuiyasawa', URL: http://www.nzhistory.net.nz/media/photo/ratu-vuiyas

He mea koha mai te whakaahua nei e Christine Liava’a. 'Ratu Tiale Vuiyasawa' Honongaitua: http://www.nzhistory.net.nz/media/photo/ratu-vuiyasawa, (Manatū Taonga).

I uru atu a Ratu Tiale Bau Mara Vuiyasawa nōna i Tāmakimakaurau me tana pānga ki te Ope Tānga Māori Tuawhā, tērā i tere ki Ihipa i te marama o Haratua i te tau 1916. Nō tētahi whānau rangatira a Ratu, i ako a ia i Poihākena. I tū a ia hei hōia i ngā whenua o Ihipa, o Wīwī hoki me te Ope Tuatahi (Pioneer Battalion) i mua i tōna whakawhitinga ki te Kamupene Rarotonga (Rarotongan Company) ki Parahitini (Palestine) i te tōmuatanga o te tau 1918 ki reira noho ai tae noa ki te tatūnga o te pakanga, kātahi ka whakahokia a ia ki Whītī i te pito o runga o te tau 1919.

I uru hoki a Ratu Josefa Lalabalavu Vana’ali’ali Sukuna, te tuakana o Ratu Tiale, hei hōia heoi anō kāore a ia i whai wāhi atu ki ngā ope taua o Piritana, o Aotearoa anō hoki. He ākonga o mua a Ratu Josefa o Te Kura Tuarua o Whanganui, i Te Whare Wānanga o Oxford a ia e ako ana i te tau 1914. Ka whati tana tono ki ngā mana o Piritana, ka uru a ia ki te kapa Wīwī mō te hunga taunaki nō whenua kē (French Foreign Legion), ka whakawhiwhia ki a ia tētahi tohu mana nui o iwi Wīwī, ko te Croix de Guerre. Nō te tūākiritanga ōna i te tōmuritanga o te tau 1915, ka hoki ki Whītī. Kātahi a Ratu Josefa ka ngana ki te uru atu ki Te Hokowhitu-a-Tū o Aotearoa, auare ake. I hoki kē a ia ki Wīwī i te tau 1917 me te Ope Taua Iwi Taketake o Whītī (Fiji Labour Corps) tae noa atu ki te paunga o te tau 1918. I hōrapa tana rongonui hei kaitōrangapū, i whakanuia hoki te kaikōkiri matua o te whāinga o ngā iwi taketake o Whītī i tō rātou tino rangatiratanga.

Te tokorua Leger nō Tonga

'Leger brothers', URL: http://www.nzhistory.net.nz/media/photo/leger-brothers, (

'Leger brothers', URL: http://www.nzhistory.net.nz/media/photo/leger-brothers, (Ministry for Culture and Heritage).


Sergeant Baisley Leger rāua ko Private Francis Leger

Tae mai ana tēnei tokorua tuakana-teina Leger ki Aotearoa i Tonga, ka uru ki te ope taua i te tau 1915. I tukuna rāua ki te whakangungu me ngā tāngata nō Niue, nō Kuki Airani hoki, mutu ana, ka tere tahi rātou hei wāhanga o te Ope Tānga Māori Tuatoru. I tū rāua ki te pakanga ki Ihipa, ki Wīwī anō hoki i mua i tō rāua hokinga mai ki Aotearoa me te iwi Niue i waenganui i te tau 1916.

I whai wāhi rāua ki te Ope Tānga Māori Tuaiwa ka hoki ki Wīwī i te marama o Whiringa-ā-nuku i te tau 1916 hei hāpai i ngā mahi a te Ope Tuatahi (Pioneer Battalion). Ko Baisley rāua ko Francis tētahi tokorua i haere tahi atu me ngā hōia o Te Moana-nui-a-Kiwa   nō te Ope Tuatahi i tukuna ki Wīwī ki te whirinaki atu ki te Ope Rarotonga ki Parahitini. I noho tonu rāua ki tēnei ope tae noa ki te otinga o te pakanga.

Sergeant Kaipati, nō Kiribati

 

Sergeant Kaipati, National Archives of Australia. NAA: R32, VOLUME 117/32.

Sergeant Kaipati, He mea koha tēnei whakaahua e National Archives of Australia. Toronga: R32, Kohinga 117/32. Me tono whakaae i te National Archives of Australia i mua i te whakamahinga anō o tēnei whakaahua.


I whakawhiti atu a Kaipati i te kapa Gilbert me Ellice ki te kapa NZEF. I mōhiotia whānuitia a Kaipati e tōna motu i tana tū hei haihana i te manatū pirihimana o Ocean Island (Ocean Island Police Constabulary). Ko ia te rangatira o te waka nāna ngā tauhou i kawe ki uta i ngā ngaru tuarangaranga. I takitahi atu rāua ko te Manatū Takiwā o ngā moutere Gilbert ki Whītī i te tau 1915. Ka hoki atu rāua mā Tāmakimakaurau. Hīkaka katoa ana a Kaipati ki te kuhu ki te aroaro tonu o te pakanga, ā, ka whakaaetia tōna hiahia e te Manatū Takiwā rā. Ka uru atu a Kaipati ki te ope taua, ka tukuna a ia ki te hopuni whakangungu hōia o Narrow Neck, ka whirinaki atu ai ki ngā tāngata Niue me ngā tāngata Kuki Airani i reira kē e whakangungu ana.

Ka eke tahi atu a Kaipati me te Ope Tānga Māori Tuatoru i te marama o Huitanguru i te tau 1916. Ka kawe i tana mahi hōia i Ihipa, i Wīwī hoki tatū iho rā ki tōna hauātanga, ka hoki a ia ki Aotearoa i te Mahuru o te tau 1917, noho tūroro ai. Ka piki te ora ki runga i a ia, ka tukuna a ia e te ope taua, ka utua tana hokinga atu ki ngā moutere Gilbert e te Kāwanatanga Aotearoa, i runga i te nui o tana whakapeto ngoi ki te pakanga.

Sione Talia’uli nō Tonga


I uru atu a Talia’uli i te tau 1915, ā, ka noho ki tētahi kaipuke tiaki tūroro. Ka whai wāhi hoki a ia ki te pakanga i Wīwī nā reira i whakawhiwhia ki a ia te hōnore Victory Medal me te War Medal o Piritana. Ko te whakamāori i ngā kōrero Niue, i ngā kōrero reo Māori o te Kuki Airini tētahi o āna kawenga. I te 11 o Whiringa-ā-nuku i te tau 1918, kotahi marama i mua mai i Armistice, ka pāngia ia ki te māuiui tarutawhiti (pneumonia), ka mate.

Tā Māui Pōmare, nō Aotearoa


Ko Māui Pōmare tērā te mema pāremata i noho hei mema mō ngāi Māori o te uru, i tū hei kaikawe i ngā take mō ngā tāngata o Te Kuki Airani, o Moutere atu anō hoki. Nō muri mai i te hinganga o te iwi Māori i te pakanga ki Gallipoli i 1915 ka tahuri a Māui ki te akiaki i ngā iwi o Aotearoa, o Te Moananui-a-Kiwa hoki ki te tautoko ā-tangata nei i te pakanga.

I whakatere waka atu a Māui ki Niue, ka hoki mai ki Tāmakimakaurau i te Whiringa-ā-nuku e 150 ngā tāngata i tana taha. Ka piri tahi atu ki tētahi 45 tāngata nō te Kuki Airani, tērā kāhui i tere waka atu ki Te Whanganui-a-Tara ka mutu, i haere ki te pāremata o Aotearoa.

Whakangungua ai ēnei kapa i te hopuni whakangungu hōia Narrow Neck hei kapa o te Ope Tānga Māori Tuatoru tae noa atu ki te marama o Huitanguru i te tau 1916, nō muri mai rātou ka wehe ki Suez.

  • Ao
  • Tāngia.
  • Tiritiria.

Kaiako' Notes

He whakatakinga tēnei kohinga pārongo ki te wāhi ki ngā hōia nō Te Moana-nui-a-Kiwa i Te Pakanga Tuatahi o te Ao:

  • te wāhi ki ngā tāngata nō te Kuki Airani, nō Niue hoki;
  • te wāhi ki ngā tāngata nō moutere atu anō o Te Moana-nui-a-Kiwa;
  • ngā toa nō Te Moana-nui-a-Kiwa;
  • te wāhi ki a Māui Pōmare i ngā mahi akiaki i ngā tāngata nō Te Moana-nui-a-Kiwa ki te uru ki ngā ope tau;

te pānga o te pakanga ki ngā tāngata me ngā whenua o Te Moana-nui-a-Kiwa.

Tīkina ake.

Ngā rauemi tautoko

3/4 portrait of Corporal Harry, probably (private in the roll) Purie Dave Harry, Reg No 16/1371, of the 3rd Maori Contingent, Rarotongans, New Zealand Maori Pioneer Battalion.

3/4 portrait of Corporal Harry, probably (private in the roll)...

3/4 portrait of Corporal Harry, probably (Private in the roll) Purie Dave Harry, Reg No 16/1371, of the 3rd Maori...

Journey to Arras

Journey to Arras

This documentary unearths the story of the soldiers in the New Zealand Tunneling Company, whose daring World War I raids...

Full portrait of two men, Private Aki standing, Reg No 19232, Maori Contingent (11th Reinforcements - Rarotongans). New Zealand Maori Pioneer Battalion.

Full portrait of two men, Private Aki standing, Reg No...

Full portrait of two men, Private Aki standing, Reg No 19232, Maori Contingent (11th Reinforcements - Rarotongans). New Zealand Maori...

Full length portrait of Corporal Harry, probably (private in the roll) Purie Dave Harry, Reg No 16/1371, of the 3rd Maori Contingent, Rarotongans, New Zealand Maori Pioneer Battalion.

Full length portrait of Corporal Harry, probably (private in the...

Full length portrait of Corporal Harry, probably (private in the roll) Purie Dave Harry, Reg No 16/1371, of the 3rd...

No 4 Platoon (Niue) 3rd Maori Reinforcements

No 4 Platoon (Niue) 3rd Maori Reinforcements

No 4 Platoon (Niue) 3rd Maori Reinforcements. Photograph taken by William Beattie (junior), possibly during World War I. Inscriptions: Photographer's...

Niue Islanders singing.

Niue Islanders singing.

Inscription at top of album page reads: Departure of "Arawa" Plymouth July 16/1915 (?possibly 1916).

Nurse Nobbs soldiers group

Nurse Nobbs soldiers group

Full length portrait of the Nurse Nobbs soldiers group, arranged in four rows in front of the verandah of the...

Gilbert Island soldiers

Gilbert Island soldiers

Soldiers from the Gilbert Islands pictured at Narrow Neck camp in Auckland.

Medal citation for Pa George Karika

Medal citation for Pa George Karika

The citation for the Distinguished Conduct Medal awarded to Private Pa George Karika, New Zealand Rarotongan Company.

Cook Islands Anzac Day parade, 1970s

Cook Islands Anzac Day parade, 1970s

Returned servicemen marching during an Anzac Day parade in Rarotonga, early 1970s

Cook Islands Anzac Day stamps

Cook Islands Anzac Day stamps

Set of commemorative Anzac Day stamps issued by the Cook Islands government

No image available.

Anzac Day service in Rarotonga, 2009

Rarotongan returned servicemen and community groups march from the Cook Islands Christian Church (CICC) to the Soldiers’ Memorial in Avarua,...

Anzacrarotonga

Anzacrarotonga

Anzacrarotonga.jpg Revue des troupes pour la journée de l'ANZAC/Troop review for the ANZAC Day (Rarotonga-Cook Islands).

Niuean and Cook Island soldiers on parade

Niuean and Cook Island soldiers on parade

Niuean and Cook Island soldiers on parade at Narrow Neck camp in Auckland, October 1915.

Atiu war memorial, Cook Islands

Atiu war memorial, Cook Islands

Atiu war memorial in the Cook Islands