Mano Reo, Mano Whakaaro


Inā te nui o ngā tirohanga a te iwi Māori ki te kirirarautanga i Aotearoa i te wā i tū ai Te Pakanga Tuatahi o te Ao. Kua rārangi mai ētahi tirohanga me ngā kupu taunaki hei tirotiro mā koutou.

‘Nōku ēnei tāngata. Nō rātou tōku reo… E kore rawa au e whakaae kia riro aku tamariki… Kāore ngā tāne kua tonoa e haere ki te pakanga… Māu tō tohe e pakanga ki tōna otinga.’ - Te Puea Herangi

Nō te pakarutanga mai o Te Pakanga Tuatahi o te Ao, ka rerekē ngā urupare o ngā tāngata Māori puta noa. Kīhai ētahi tāngata i whakaae, i tautoko hoki i te pakanga a te Karauna nāna tonu ngā whenua o te iwi Māori i raupatu i te rau tau tekau mā iwa. He hunga hoki i hiahia ki te tautoko, heoi anō, i te tīmatanga, karekau he ara ki te pēnā. E ai ki ngā kaupapa here o te karauna o te wā, kāore i whakaaetia te tū a ngā tāngata taketake ki ngā tāngata Pākehā ki te pakanga. Ka rerekē tēnei tirohanga i te hinganga haere o ngā hōia, i te nui haere hoki o te hiahia ki ngā ope tānga. He aha i pēnei ai te rerekē o ngā tirohanga?

E rārangi mai ana i konei ētahi tirohanga i puta i Aotearoa i ngā tau o te Pakanga. Torohia ngā honongaitua e kitea ai te hōhonutanga o ēnei tirohanga.

CowMaorP021a

Te Rangi Hīroa (Tā Peter Buck)

‘He iwi whawhai ō tātou tīpuna… ka rohea ngā mema o tēnei ope taua i te otinga o te pakanga, i te hokinga atu ki ō rātou kāinga me ko te rauhī noa iho tā rātou mahi, kāore rātou i whai wāhi ki te whakaatu i tō rātou taea i ngā mahi ki te mura o te ahi.’[1]

He uri a Te Rangi Hīroa o Ngāti Mutunga. I kuraina ia i Te Kāreti o Te Aute, mutu ana, ka whakawhiti atu ia ki Te Kura Whaiora o Ōtākou (ki Ōtepoti), ka puta tōna ihu hei rata. I whakatūria ia hei kaitōrangapū, hei kanohi mō Ngāi Māori o Te Tai Tokerau i te tau 1909. I noho ia ki te Kōmiti Take Māori, i whai wāhi poto hoki ia ki te Kāhui Minita mō te iwi Māori. I te wā o Te Pakanga Tuatahi o te Ao, i kaha tā Te Rangi Hīroa akiaki i te iwi Māori ki te tū hei hōia. I tū ia hei āpiha hauora ki ngā whenua o Te Pūtahi o te Rāwhiti (Middle East), o Karipori (Gallipoli), o Wīwī (France) hoki.  E rua rawa ngā wā i whakaīngoatia ia i ngā rīpoata ki ōna āpiha teitei, ā, ko te tukunga iho, i whakawhiwhia ia ki te tohu toa DSO. I te mutunga o te pakanga, ko tana tūnga he meiha.

He pārongo atu anō kei: http://www.teara.govt.nz/mi/biographies/3b54/buck-peter-henry(external link)

Te Puea Hērangi

'Ka ākina tātou ki te pakanga mō te kīngi me te whenua. Kei te pai noa iho tēnā. He kīngi tō tātou engari anō te whenua, kua kore. Kua kāhakina i ō tātou ringa. Kia whakahokia mai ō tātou whenua mō reira tātou ka whakaaro anō ai ki te wāhi ki a tātou i tēnei pakanga.’

I mautohe a Te Puea ki te whakahē i te kaupapa māperetanga a te kāwanatanga, i te pōuri tonu tōna iwi i te whakaekenga ō rātou e ngā hōia o te kāwanatanga, i te wā o te murunga o ngā whenua. I kaha kē atu te whakaaro o Tainui, o te rohe o Waikato-Maniapoto i te kaha tō rātou he mea tūkino rātou tia  e te kāwanatanga. Nāna, nā Te Puea ōna tāngata i māpere, i karanga ki tōna pā, ki Te Paina i Mangatāwhiri, ki te tautoko i a ia. I whakarōpūtia rātou i te tau 1918, i mauheretia, ā, i kawea ki te puni whakangungu hōia ki Narrow Neck i Tāmakimakaurau. I reira tūkinotia ai i te korenga o rātou i whakaae ki ngā kara hōia hei kākahu mō rātou.

He pārongo atu anō kei: http://www.teara.govt.nz/mi/biographies/3h17/herangi-te-kirihaehae-te-puea(external link)

Henare Wēpihana Te Wainohu

'Kia mahara ake, kei te kapu o tō ringa e puritia ana i tēnei pō te mana, te hōnore me te tapu o te Māori.’

I ngā hōia o Te Ope Tuatahi o Aotearoa e whakahoki mahara ana ki ‘te Pāpā’ (the Padre), ka rongo i te ngākaunui motuhenga ki te tangata nei, ki a Pāpā Henare Wēpihana Te Wainohu. Nōna e noho ana hei minita mā ngā hōia i te wā o Te Pakanga Tuatahi o te Ao, ka mau ki te ngākau o ngā hōia tōna āhua. I a rātou e noho tawhiti ana i ō rātou whānau, i a rātou e noho tuwhera ana ki ngā karawhiunga o te pakanga, ko Pāpā Henare tērā i noho hei kaiārahi i a rātou i roto i ngā mahi ā-wairua, ā-ahurea anō hoki. 

He pārongo atu anō kei: http://www.teara.govt.nz/mi/biographies/3t23/te-wainohu-henare-wepiha(external link)

Rua Kenana

Rua Kenana. Te Puna Mātauranga o Aotearoa: Alexander Turnbull Library. Toronga:

Rua Kenana. Te Puna Mātauranga o Aotearoa: Alexander Turnbull Library. Toronga: 1/2-019618-F]

“E kotahi mano, whā rau tāngata kei konei e kore rawa au e whakaae kia uru atu, kia haere rānei tētahi o rātou ki te pakanga. Karekau ō Kīngi. Kāore o te Kīngi o Ingarangi take. Kua hinga. Ka toa ngā Tiamani. Me he kapa petipeti āku, kua tukuna ki ngā Tiamani. Kāore o ngā tāngata Pākehā painga. E rua ā rātou ture. Ko te tuatahi mā te iwi Māori, ko te tuarua, mā te iwi Pākehā. Kia toa ngā Tiamani ka noho ahau hei kīngi i konei. Ko au ka noho hei kīngi o te iwi Māori me te iwi Pākehā."[2] 

He poropiti a Rua Kēnana nō te iwi o Tūhoe, ā, nāna te hapori ki Maungapōhatu i ngā pae maunga o te Urewera i whakahuihui. He mea whakatairanga āna kupu poropiti te tino rangatiratanga o te iwi Māori i ngā ture o te kāwanatanga. I wheke te ture ki a Rua Kenana me āna mahi whakawhere i te iwi, ā, i arua ia i raro i ngā tikanga o Te Ture Tāmi Tohunga o te tau 1907. Koia te ture i haukoti i te whakamahinga o ngā tipu rongoā Māori me ngā ara Māori ki te whakaora i te tangata e ngā kaihāpai o ēnei mahi taketake. 

I whakanonoi a Rua i ōna tāngata kia ākiria e rātou ngā mahi hōia. Ki tāna, kāore i te tika tā rātou tū hei hōia mō te Kīngi Pākehā me ōna Whenua i runga i te āhua o ngā mahi tūkino i te iwi Māori i raro i te karauna o Te Tōpūtanga o ngā Whenua o Ingarangi. I mea ake a Rua, i pōhēhētia tēnei mahi āna e te kāwanatanga he mahi kūpapa, mea rawa ake, ka whai take te Kāwanatanga me ngā hoariri o Rua ki te tohe ki a Rua Kenana me tōna hapori i Maungapōhatu. I te tau 1916, i mauheretia a Rua mō āna mahi whakahē i te māperetanga o te Māori ki Te Pakanga Tuatahi o te Ao.

Koinei te whare i tū ki te pā nā Rua Kenana i whakarite. E whakaaturia ana i kon

Koinei te whare i tū ki te pā nā Rua Kenana i whakarite. E whakaaturia ana i konei te wā i mauheretia rāua ko tana tamaiti. Te Puna Mātauranga o Aotearoa: Alexander Turnbull Library.]

He pārongo atu anō kei: http://www.teara.govt.nz/mi/nga-poropiti/page-6(external link)

Ethel Pritchard

Ko Nēhi Ethel Pritchard, nōna e mahi ana me Te Ratonga Nēhi o te ope taua o Aote

Ko Nēhi Ethel Pritchard, nōna e mahi ana me Te Ratonga Nēhi o te ope taua o Aotearoa. Te Whare Taonga o te Tairāwhiti. Me tono whakaae i Te Whare Taonga o Tairāwhiti, i mua i te whakamahinga anō o tēnei whakaahua.

‘Ina taotūtia me te pū, ka kitea he ara whakarauora heoi anō karekau he ara i kitea e ora anō ai te tangata ina ngaua a ia e te mātao.’

 I te pakarutanga mai o Te Pakanga Tuatahi o te Ao, ka kōwhiritia a Ethel ko tētahi o ngā nēhi tuatahi, rima tekau nei rātou, hei haere ki tāwāhi me te rōpū nēhi o te ope taua o Aotearoa. Ko te hōhipera pārāweranui Nama 15 i Arekehānaria, i Īhipa, te wāhi tuatahi i mahi ai a Ethel. Tokoiwa ngā tāngata i noho i raro i tōna marumaru i tiaki i tōna 240 tūroro i ngā tēneti e takoto ana. I te taenga atu o ngā tāruru tino nui kē nei e mau mai ana i ngā taotū i Karipori, i te takiwā o te 190 tūroro i tākaihia i ia rā. I nui te pānga atu o te mate kōea, te mate tūtae tororē me te taipō piwa, ā, i kino rawa atu ngā tūnga puhitanga.

He pārongo atu anō kei: http://www.teara.govt.nz/en/biographies/5p38/pritchard-ethel(external link)

Henry Te Reiwhati Vercoe

Te Ope Māori nō te tau 1915. Te Rua Mahara o te Kāwanatanga Archives New Zealand

Te Ope Māori nō te tau 1915. Te Rua Mahara o te Kāwanatanga Archives New Zealand. Toronga WA 97/3 Box 2/ 15

‘E taunaki ana i konei te tōngakingaki kua ōruatia o te iwi Māori ki te pakanga ki te wheiwheiā a tōna Kīngi, me tōna nanaiore kia whai mana, kia mana hoki ai te tū ki te taha tonu o ōna pononga’ 

Ko Henry Vercoe tētahi hōia i tae atu ki Te Pakanga Pōa (The Boer War) me Te Pakanga Tuatahi o te Ao me te Ope Māori. Tatū atu ai rātou ki te whenua o Anzac i Karipori i te 3 o Hōngongoi, i te tau 1915 me te ope taua i kīia nei ko Te Ope Taua Eke Hoiho o Aotearoa. I taotūtia a Henry i te mura o te ahi i te 8 o Hereturikōkā heoi anō, i noho tonu atu ia ki te pakanga. I te marama o Mahuru, i heria ia ki te hōhipera ki Mūtoro (Moúdros)  i te pohūtanga o tōna hiku whēkau. Ka piki te ora ki a ia, ka tukuna ia ki te Ope Taua o Te Whanganui-a-Tara. I te rangatira, i te māia hoki o āna mahi i te papa o Tū, ka kōrerohia ia i ngā pūrongo a ngā rangatira - e whā rawa ngā wā i pēnei ai - ā, i whakahōnoretia ia ki te taitara Rūtene Tuarua.

I te pakari kau o tōna tinana, i kōwhiritia ia ki te Kapa Ō Pango i te tau 1905, heoi anō, kāore ia i wātea ki te haere atu; i te tau 1914 i noho ia hei kaitākaro mō te Kapa Ō Pango Māori. Ko te tikanga ia, ko ia hoki tētahi kaitākaro mō te tīma a Te Ope Tuatahi Māori i te tau 1919.

He pārongo atu anō kei: http://www.teara.govt.nz/mi/biographies/3v5/vercoe-henry-te-reiwhati(external link)

He kōnae oro kei: http://www.28maoribattalion.org.nz/audio/ohinemutu-1943-major-henry-te-reiwhati-vercoe(external link)

 

Tonga Mahuta

Ko Tonga te tamaiti morehu tuawhā o ngā tamariki a Mahuta Tāwhiao Potatau Te Wherowhero, te kīngi Māori tuatoru. Ko Te Marae tōna māmā, he tamāhine nā te rangatira Amukete (Amuketi) Te Kerei, tērā i hinga i tētahi pakanga ki Rangiriri i te Whiringa-ā-rangi. Ko te tuakana o Tonga ko Te Rata, te kīngi tuawhā. He tamariki a Tonga i te huatakitanga o Te Pakanga Tuatahi o te Ao i te tau 1914. I horokukū te whakaae atu a ngā rangatira o te Kīngitanga ki te tūaotanga o ā rātou taitamatāne ki Te Pahītanga Taua o Aotearoa, i te mea, kāore anō ngā take i puta i te murunga o ngā whenua i te rohe o Waikato kia whakatauhia ka tahi, ka rua, he kaipupuri rātou i ngā āhuatanga o te whakahoutanga o te whakapono Pai Mārire nā Tariao. Kīhai a Tonga Mahuta i whakautu i te karanga whakangungu hōia i te tau 1914 nā reira ia i meatia kia utu whaina. 

He pārongo atu anō kei: http://www.teara.govt.nz/mi/biographies/3m34/mahuta-tonga(external link)

He whakaahua kei: http://paperspast.natlib.govt.nz/cgi-bin/paperspast?a=d&d=AS19160512.2.53(external link)

 

Pahikore Te Koeti Turanga 

I te wā o Te Pakanga Tuatahi o te Ao, i te marama o Whiringa-ā-nuku, i te tau 1914, ka uru atu ai a Pahikore ki te Ope Tānga Māori. Nōna e whawhai ana ki te whenua ki Wīwī i me Te Ope Tuatahi o Aotearoa, ka whai wāhi ia ki tētahi kaingākautanga ōna, ki ngā whakataetae tope rākau. I te marama o Paengawhāwhā, i te tau 1916, i te takiwā o te Ngahere o Nipi (Forêt de Nieppe), ka tū ai tētahi whakataetae tope rākau i waenganui i tētahi kapa taua Māori me tētahi kapa taua Wīwī. E toru miniti te toanga ake o te kapa Māori. I te marama o Haratua, ka tū a Pahikore hei mata mō Aotearoa i te whakataetae tope rākau i whakaritea hei tohu i te toa o ngā taua puta noa.

He pārongo atu anō kei: http://www.teara.govt.nz/mi/biographies/3t15/te-koeti-turanga-pahikore(external link)


[1] J.B. Condliffe, Te Rangi Hīroa: the life of Peter Buck, Whitcombe and Tombs, 1971, p127

[2]  Sheehan, Mark (1989), Māori and Pākehā: Race Relations 1912–1980. MacMillan, New Zealand.

  • Ti
  • Tāngia.
  • Tiritiria.

Kaiako' Notes

Inā te nui o ngā tirohanga a te iwi Māori ki te kirirarautanga i Aotearoa i te wā i tū ai Te Pakanga Tuatahi o te Ao. Kua whakarārangihia ētahi tirohanga me āna kupu taunaki hei tūhura mā koutou ko ngā ākonga. Ka arohia:

  • te māperetanga, te tūaotanga i te wā o te pakanga me ō ia āhuatanga pānga ki te hapori

  • te tika me te hē - mā wai, mā te aha hoki e whakatau?

  • ngā tikanga whakahaere hapori e mārire ai te noho

  • ngā hua o te pakanga ki te tangata ā mohoa nei.
Tīkina ake.